د بادغیس ولایت د ارزاقو لوی مدیر له روزنتون څخه څارنه وکړه؛
د بادغیس ولایت د ارزاقو لوی مدیر ښاغلی محمد یوسفي وايي، چې تېره ورځ یې د دې ولایت د کار او ټولنیزو چارو ریاست اړوند روزنتون زده کوونکو ته د پخلي او ډوډۍ د برابرولو او وېش پر مهال څارنه او ارزونه ترسره کړه.
نوموړی زیاتوي، چې په یاد روزنتون کې دا مهال۱۱۰ تنه یتیمان او بېسرپرسته ماشومان تر روزنې لاندې دي او اړین خوراکي توکي ورته د ارزاقو امارتي شرکت له خوا برابریږي.
هغه ډاډ څرګند کړ، چې د روزنتون د لیلیې لپاره د خوراکي توکو برابرول او چمتو کول په ښه او منظم ډول ترسره کیږي او د یاد روزنتون مسوولین د ارزاقو امارتي شرکت له پروژوي چارو خوښ او په دې برخه کې رضایت څرګند کړی دی.
دا په داسې حال کې ده، چې په مرکز او ولایتونو کې د خوراکي توکو د برابرولو او څارنې بهیر د ارزاقو امارتي شرکت له خوا په دوامداره توګه ترسره کیږي.
