د هلمند او سمنګان د ارزاقو مدیرانو د خپلو اړوندو ولایتونو له روزنتونونو څخه څارنه وکړه
د هلمند ولایت د ارزاقو مدیر مولوي قدرتالله معصوم وویل، چې د کار او ټولنیزو چارو ریاست اړوند د احمد ابن حبان بُستي روزنتون څخه یې څارنه او ارزونه ترسره کړې ده.
د نوموړي په وینا؛ د څارنې پر مهال د روزنتون د پخلنځي چارې او د خوړو د چمتو کولو بهیر په داسې حال کې وارزول شو، چې ماشومانو ته د غرمې د خوړو د وېش لړۍ روانه وه. هغه زیاته کړه، چې د خوړو د کیفیت او کمیت له پلوه کومه ستونزه نه وه موجوده او د روزنتون مسوولین د شرکت له خدماتو څخه خوښ و.
بل لور ته؛ د سمنګان ولایت د ارزاقو مدیر محمدجان فایز هم خبر ورکوي، چې په دغه ولایت کې یې د هلکانو او نجونو د روزنتونونو چارې له نږدې څارلي او ارزولي دي. نوموړي همداراز د روزنتون له آمر سره د خوراکي توکو د لېږد، تنظیم او د پروژو د لا ښه والي په اړه هم خبرې اترې کړې دي.
دا په داسې حال کې ده، چې تېره ورځ د سرپل ولایت د ارزاقو مدیریت د مالي او اداري مدیر فضلالدین امید هم د خپل ولایت اړوند روزنتون څخه څارنه او ارزونه کړې وه.
