په کاپیسا ولایت کې د ارزاقو امارتي شرکت تصرف شوی ګدام بېرته راوګرځول شو؛
له کلونو ځنډ وروسته د کاپیسا ولایت د ارزاقو امارتي شرکت پورې اړوند یو باب ګدام بېرته د تصرف څخه خلاص او د یاد شرکت واک ته وسپارل شو.
د کاپیسا ولایت د ارزاقو امارتي شرکت لوی مدیر قاري فریدون مصلح وایي، چې دا ګدام نږدې دوه نیمې لسیزې وړاندې د کرنې ریاست له خوا تر تصرف لاندې ؤ.
نوموړی زیاتوي، چې د ولایت مقام د حکم له مخې؛ د یو باصلاحیته پلاوي په شتون کې دغه ګدام په رسمي ډول وړمه ورځ له کرنې ریاست څخه د ارزاقو امارتي شرکت ته وسپارل شو.
قاري مصلح همداراز وویل، چې د یاد ګدام ټول مساحت له شپږو بسوو څخه زیات دی او د ټولو حقوقي او اداري مراحلو تر بشپړولو وروسته به د تسلیمۍ اسناد هم ترلاسه کړي.
دا لاسته راوړنه او پرمختګ په داسې حال کې تر سره کېږي، چې تېر کال هم د ارزاقو امارتي شرکت پورې اړوند ځیني جایدادونه په کونړ او غزني ولایتونو کې له تصرف څخه راخلاص او بېرته د یاد شرکت واک ته سپارل شوي دي.
