د امارتي شرکتونو لوی ریاست استازو د ارزاقو امارتي شرکت له اجرائیوي رییس سره وکتل
د امارتي شرکتونو لوی ریاست درې تنو استازو د ارزاقو امارتي شرکت په کاري دفتر کې له اجرائیوي رییس سره د پانګونې د فرصتونو د رامنځته کولو او د لا ښې همغږۍ په موخه ناسته او خبرې اترې وکړې.
په پیل کې د ارزاقو امارتي شرکت اجرائیوي رییس مولوي عبدالرازق رفیع د امارتي شرکتونو لوی ریاست استازو ته ښه راغلاست ووایه او د شرکت د فعالیتونو او خدمتونو په اړه یې لنډ معلومات وړاندې کړل.
نوموړي د شرکت د چارو د ښه والي، پرمختګ او لاسته راوړنو یادونه وکړه او د لا غوره پرمختګ لپاره یې یو شمېر وړاندیزونه هم د امارتي شرکتونو لوی ریاست استازو سره شریک کړل.
ورپسې د امارتي شرکتونو لوی ریاست د فرصتونو د رامنځته کېدو آمر مولوي شبیراحمد معاذ، د طرحو د ترتیب او جوړولو کارپوه عبدالله قاسمي او د پانګونې د جلب او جذب آمر حضرت بلال صافي په خپلو خبرو کې وویل، چې یاد ریاست په پام کې لري د ټولو شرکتونو د لا ودې او پرمختګ لپاره د پانګونې د فرصتونو معیاري طرحې جوړې کړي، ترڅو د هېواد د اقتصادي پرمختګ ترڅنګ خلکو ته کاري فرصتونه برابر او اقتصادي هوساینه رامنځته شي.
همداراز، نوموړو د ارزاقو امارتي شرکت د اساسي فعالیتونو، جایدادونو، پانګونې او د عوایدو د راټولولو په اړه له اجرائیوي رییس څخه د معلوماتو غوښتنه وکړه، چې د شرکت د اجرائیوي رییس له لوري ورته قناعت بښونکي ځوابونه وویل شول.
د ناستې په پای کې د امارتي شرکتونو لوی ریاست استازو غوښتنه وکړه، چې په رسمي ډول د ارزاقو امارتي شرکت د پانګونې د فرصتونو، لومړیتوبونو، وړاندیزونو، ستونزو او د حل لارو په اړه د یوې جامع طرحې د جوړولو اړوند معلومات ترلاسه شي.
