د لغمان ولایت د ارزاقو مدیریت له خدمتونو او هڅو ستاینه وشوه
د لغمان ولایت د ارزاقو مدیریت له خدمتونو او هڅو ستاینه شوې، چې پر وخت او په ښه کیفیت سره د اړتیا وړ خوراکي توکي د کار او ټولنیزو چارو ریاست پورې اړوند روزنتون ته د بنسټیزو فعالیتونو، سوداګریزو چارو او د ۱۴۰۴ مالي کال له پلان سره سم لېږدولي او سپارلي دي.
د دې ولایت دکار او ټولنیزو چارو ریاست د ارزاقو لوی مدیر وحیدالله الکوزي ته د ستاینې په توګه یوه معنوي ډالۍ (ستاینلیک) ورکړې، چې پکې د ارزاقو ولایتي مدیریت د نه ستړې کیدونکو هڅو او د کارکوونکو د خدمتونو ستاینه شوې ده. همداراز په دې ستاینلیک کې د ارزاقو مدیریت ټولو کارکوونکو ته د لا زیاتو بریاوو هیله کړې ده.
د یادونې وړ ده، چې له دې وړاندې د ارزاقو امارتي شرکت چارې او خدمتونه په مرکز او ولایتونو کې د بېلابېلو ادارو له لوري ستایل شوې دي.
