د کونړ پوهنتون لیلیې ته ۱۱ قلمه خوراکي توکي ولېږدول شول
د ارزاقو امارتي شرکت له لوري نن ورځ کونړ ولایت پوهنتون ته ۱۱ قلمه خوراکي توکي واستول شول.د کونړ ولایت د ارزاقو لوی مدیر کریم خان کلیوال وایي، چې یاد خوراکي توکي د دې ولایت پوهنتون لیلیې ته د اړتیاوو په اساس لېږدول شوي دي، چې د کتنې پلاوي په شتون کې اړوند مسوول ته وسپارل شول.
نوموړی زیاتوي، چې په یادو خوراکي توکو کې۳۰۰۰ کیلوګرامه وریجې، ۱۰۰ کیلوګرامه غوړي، ۴۰۰ کیلوګرامه لوبیا، ۲۰۰ کیلوګرامه د خواړو مالګه، ۲۵ کیلوګرامه شین چای، ۶۰۰ کیلوګرامه بوره، ۱۰۰ کیلوګرامه اومه نخود، لس کیلوګرامه هلنمدۍ زیره، ۱۵ کیلوګرامه د دیګ مصاله، ۱۵۰ کیلوګرامه رُب او دوه کیلوګرامه د چای هیل شامل دي.
د کلیوال په خبره؛ د کونړ پوهنتون مسوولینو د ارزاقو امارتي شرکت له چوپړتیاوو خوښي څرګنده کړې او د شرکت چارې ستایې، چې پر وخت او په لوړ کیفیت سره د پوهنتون د لیلیې اړتیاوې پوره کوي.
دا په داسې حال کې ده، چې د ارزاقو امارتي شرکت په دې وروستیو کې د هېواد پوهنتونونو لیلیو او نورو ادارو ته د خوراکي توکو د لېږد پروسه چټکه کړې ده.
