د ارزاقو امارتي شرکت د اجرائیوي رئیس د مبارکۍ پیغام!
د نېکمرغه کوچني اختر په مناسبت؛ د ارزاقو امارتي شرکت د اجرائیوي رئیس د مبارکۍ پیغام!
د کوچني اختر د رارسیدو په مناسبت تاسو ټولو هېوادوالو ته د زړه له کومي مبارکي وړاندې کوم. الله تعالی دې وکړي، چې د دې بختور اختر له برکته په هېواد کې د یووالي، ورورولۍ، یو بل منلو اصل پیاوړي کړي، له هېواده د نفاق او شقاق تخم له رېښو وچ کړي او دغه راز له هېواده د بېوزلۍ او فقر ټغر لرې او ځای یې د هوساینې، سوکالۍ، اقتصادي پیاوړتیا، ځان بسیاینې او پرمختګ لړۍ ونیسي.
درنو هېوادوالو!
کوچنى اختر د ورورولۍ، همدردۍ، همکارۍ او نېکمرغۍ نښه ده، چې دغو رازونو ته رسیدل یوازې او یوازې په خپلو کې منسجم کېدل، له زړونو کینې، نفرتونه او دښمني لرې کولو سره ترسره کېدلای شي. نو الله تعالی دې موږ سره د خپلو عملونو په سمون او د ټولنې په جوړولو کې مرسته وکړي.
راځئ قدرمنو هېوادوالو! د اختر دغه خوږې شیبې له خپلو هېوادوالو سره د مینې او محبت په فضاء کې ولمانځو او د بېوسو هېوادوالو لاسنیوی وکړو، چې ژوند مو له پوره نېکمرغۍ او خوښیو ډک او په دیني انوارو منور واوسي.
تاسو ټولو ته یو ځل بیا د دغه نېکمرغه اختر مبارکي وایم، اختر مو بختور شه!
