د هلمند پوهنتون استادانو ته دولس قلمه خوراکي توکي ولېږدول شول
د امارتي شرکتونو لوی ریاست اړوند د ارزاقو امارتي شرکت د خپلو دوامداره فعالیتونو په لړ کې د هلمند ولایت د پوهنتون ۱۴ تنو مسافرو استادانو ته د اړتیا وړ دولس قلمه خوراکي توکي لېږدولي دي.
د ارزاقو امارتي شرکت د پروژو د تطبیق مسوولین وایي، چې دغه توکي د هلمند ولایت د ۱۴ تنو مسافرو استادانو د درېیو میاشتو اړتیاوو د پوره کولو په موخه او د شویو تړون له مخې، لېږدول شوي دي. په یادو توکو کې وریجې، لوبیا، غوړي، شین چای او نور اړین خوراکي مواد شامل دي.
د هغوی په وینا، دغه توکي د هلمند ولایت د پوهنتون لیلیې اړوند مسوول ته د کتني پلاوي په شتون کې وسپارل شول.
د یادونې وړ ده، چې د ارزاقو امارتي شرکت د خدمتونو لړۍ د هېواد په ټولو ولایتونو کې روانه ده او د دې بهیر څارنه او ارزونه د ولایتي مدیرانو له لوري ترسره کېږي.
