د ارزاقو امارتي شرکت د اجرایوي کمېټې نوبتي غونډه جوړه شوه
د ارزاقو امارتي شرکت د اجرایوي کمېټې نوبتي غونډه ترسره شوه. دغه غونډه د شرکت د اجرائیوي رییس مولوي عبدالرازق رفیع په مشرۍ جوړه شوه.
په دې غونډه کې د مالي او اداري چارو رییس مولوي مطیعالله مجروح، د سوداګریزو چارو پراختیا رییس مولوي نیک محمد معتصم، د تدارکاتو، املاکو، مالي، د پروژو د تطبیق، د کارکوونکو چارو او خدماتو آمرینو، همدارنګه د پلټنې او پلان مدیرانو ګډون کړی و. غونډه د قرآن کریم د څو مبارکو آیاتونو په تلاوت پیل شوه.
ورپسې د اجنډا له مخې؛ پر نویو موضوعاتو خبرې وشوې. په یاده غونډه کې د شرکت د جایدادونو د تړون ورکولو پر څرنګوالي، د پروان ولایت د ارزاقو مدیریت لپاره د څښاک اوبو د ستونزې هواري، د لغمان ارزاقو مدیریت لپاره د ژورې څاه د کېندلو، په بغلان ولایت کې د شرکت پورې اړوند د ګدام د ویجاړ شوي دیوال د بیارغونې او همدارنګه د شرکت د جایدادونو څخه د پاتې مقروضاتو د راټولولو په اړه هر اړخیز بحثونه وشول.
یادې موضوعګانې، چې ډېری یې د املاکو له برخې سره تړاو لرلې، د اجرائیوي کمېټې له لوري د تأیید وړ وګرځېدې.
د غونډې په پای کې د اجرائیوي کمېټې مشر مولوي عبدالرازق رفیع او د سوداګریزو چارو د پراختیا رییس مولوي نیک محمد معتصم د شرکت د کړنو د لا ښه والي او د خدمتونو د وړاندې کولو د بهیر د پیاوړتیا پر اهمیت ټینګار وکړل او ویې ویل، چې د ستونزو د حل او د چارو د چټکتیا لپاره باید کوټلي او عملي ګامونه واخیستل شي.
غونډه د مالي او اداري چارو رییس مولوي مطیعالله مجروح د دعا په لوستلو سره پای ته ورسېده.
