د ارزاقو امارتي شرکت د خالي بستونو لپاره د مرکه یي آزموینې بهیر ترسره شو
د ارزاقو امارتي شرکت مرکزي دفتر د دوو څلورم بستونو او د کاپیسا ولایت د ارزاقو مدیریت اړوند د یوه پنځم بست د ډکولو په موخه څه موده وړاندې تحریري آزموینه اخیستل شوې وه. د یادې آزموینې د پایلو له ارزونې وروسته هغه نوماندان، چې لوړې نمرې یې ترلاسه کړې وې د مرکه یي آزموینې لپاره راوبلل شول.
مرکه یي آزموینه د دوو ورځو په لړ کې د شرکت د غونډو په تالار کې ترسره شوه، چې د شرکت مالي او اداري چارو رییس، د سوداګریزو چارو د پراختیا رییس، د آزموینې کمېټې غړي او د امارتي شرکتونو لوی ریاست استازي حضور درلود.
د شرکت د کارکوونکو چارو آمریت د معلوماتو له مخې؛ یاده آزموینه د انجنیري بست، د کورني او بهرني سوداګرۍ مدیریت او همدارنګه د کاپیسا ولایت د ارزاقو مدیریت اړوند د مالي، اداري او املاکي پنځم بست لپاره ترسره شوه. د تحریري آزموینې له بریالۍ ارزونې وروسته، ۶۷ تنه نوماندان د مرکه یي آزموینې دویم پړاو ته بریالي شوي وو.
د کارکوونکو چارو آمریت مسوول وویل، د مرکه یي آزموینې له بشپړې ارزونې وروسته به د هر بست لپاره هغه نوماند، چې تر ټولو لوړې نمرې ترلاسه کړي وي په رسمي توګه په اړونده دنده وګمارل شي.
