د میدان وردګو پوهنتون استادانو لپاره دولس قلمه خوراکي توکي ولېږدول شول
ارزاقو امارتي شرکت د خپلو بنسټیزو فعالیتونو، سوداګریزو چارو او د روان مالي کال د منظور شوي پلان له مخې؛ وړمه ورځ یې د میدان وردګو پوهنتون استادانو لپاره ۱۲ قلمه د اړتیا وړخوراکي توکي لېږدولي دي.
د میدان وردګو ولایت د ارزاقو لوی مدیر سید شمسالدین اکبر وویل، چې دغه توکي د مرکز له ګدامونو بار او د پوهنتون اړوند مسوول ته د کتنې پلاوي په شتون کې وسپارل شول.
نوموړی زیاته کړه، چې په یادو خوراکي توکو کې؛ ۸۴۶ کیلوګرامه وریجې، ۲۳۴ کیلوګرامه اوبلن غوړي، ۹۳.۶ کیلوګرامه بوره، ۵۵.۲ کیلوګرامه لوبیا، ۵.۴ کیلوګرامه شین چای، ۵۷.۶ کیلوګرامه د خواړو مالګه، ۲۸.۸ کیلوګرامه د بانجانو رومیو رُب، ۹.۲ کیلوګرامه خام نخود، ۰.۲ ګرامه د چای هېل، ۱.۱ کیلوګرامه زیره، ۱.۸ کیلوګرامه د دیګ مساله او ۰.۷ ګرامه زردچوبه شامل دي.
د یوبل خبر له مخې؛ د لغمان ولایت د ارزاقو مدیر وحیدالله الکوزي وړمه ورځ د کار او ټولنیزو چارو ریاست اړوند روزنتون له بېلابېلو برخو څخه لیدنه وکړه.
الکوزي وویل، چې د لیدنې پر مهال یې د خوراکي توکو د وېش بهیر، د خواړو کیفیت او کمیت او همدارنګه پخلنځی یې له نږدې وکتل. نوموړي د پاکوالي، نظم او د غوره فعالیتونو د ترسره کولو په اړه اړوندو مسوولینو ته یو لړ سپارښتنې هم وړاندې کړې.
