د بلخ ولایت د ارزاقو لوی مدیر له روزنتون څخه څارنه وکړه؛
د بلخ ولایت د ارزاقو لوی مدیرمحمد کاظم مهدي یار وړمه ورځ په دې ولایت کې د کار او ټولنیزو چارو اړوند روزنتون زده کوونکو ته د پخلي او ډوډۍ د برابرولو او وېش پر مهال څارنه وکړه. هغه څرګنده کړه چې د ارزاقو مدیریت له مهمو مسوولیتونو یو هم د پروژو ښه تطبیق، په کاري برخو کې د خلاوو ډکول او څارنه ده، چې دا کار د ادارو د رضایت او پرمختګ لامل ګرځي.
محمدکاظم مهدي یار زیاته کړه، چې په دې ولایت کې د ارزاقو امارتي شرکت له پروژو پر مداوم ډول څارنه او نظارت کیږي، ترڅو په دې برخه کې کومه ستونزه رامنځته نه شي.
هغه ډاډ څرګند کړ، چې د بلخ ولایت د کار او ټولنیزو چارو روزنتون ته د ۲۱۰ تنو نجونو او هلکانو لپاره په وخت او ښه کیفیت د غبرګولي میاشتې راهیسې د کال ترپای پورې د اړتیا وړ خوراکي توکي برابر وي.
د یادونې وړ ده، چې د ارزاقو امارتي شرکت د خپلو بنسټیزو فعالیتونو له مخې دولتي او نادولتي ادارو ته د اړتیا وړ خوراکي توکي د برابرولو او لیږد پروژه پر مخ وړي، چې د بلخ ولایت په ګډون؛ د هېواد ټولو ولایتونو روزنتونونه هم په دې پروژه کې شامل دي.
