پسرلی د نوي پيل او بدلون موسم؛
پسرلی د نوي پيل او بدلون موسم؛
لیکنه: شېرمحمد امیني ستانکزی
پسرلی د کال هغه موسم دی، چې طبیعت ته نوی رنګ ورکوي او د کال پیل له همدې موسم څخه کیږي. دغه زرغون موسم له تودې هوا، د طبیعت له ښکلا او د رنګارنګ ګلانو له خوندورو بویونو سره پیلیږي.
په دې موسم کې انسانان خپل ذهني پلانونه جوړوي او د ژوند نوي هدفونه ټاکي. هر وګړی په دې هڅه کې وي، چې د خوښۍ رنګینې شیبې تازه کړي او د نویو هیلو او موخو سره ځان د پرمختګ لوري ته وباسي.
د پسرلي موسم کې ونې، بوټي او کښتونه شنه کیږي، چې ورسره طبیعت ته ځانګړی ښکلا ور په برخه کوي. له دغو ښکلاوو او تازه هواوو څخه نه یوازې انسانان ګټه اخلي؛ بلکې د هوا مرغان او د ځمکې پر سر حیوانات او خزنده ګان هم خوندور ژوند او نوې انرژی ترلاسه کوي.
پسرلی په ډېریو کلتورونو کې د نوي کال د پیل نښه ګڼل کیږي، چې له نوي ژوند او نويو فرصتونو سره تړاو لري.
دا موسم د مخکنیو ستونزو او ناخوالو تر څنګ د یو نوي فصل پیلامه ده، چې انسانان ته دا فرصت ورکوي، ترڅو خپلې پخوانۍ ستونزې تر شا پرېږدي او د یو نوي ژوند لپاره د ورورګلوي او اخوت دروازې پرانیزي، چې دا د یووالي او د مثبت بدلون په لورې څرګندويي کوي.
پسرلی یوازې د هوا بدلون نه دی؛ بلکې دا د ژوند د بیلابېلو اړخونو لپاره یوه نوی پیل دی. دا موسم د انسانانو لپاره یوه نښه ده، چې باید خپل عمر په خوشحالۍ، مینې او محبت تېر کړي. له کرکو، نفرتونو او بې ځایه تربګنیو څخه لاس واخلي او د سولې او ورورګلوي ژوند ته دوام ورکړي.
یو څرګند حقیقت دا دی، چې د کال څلور موسمونه خپله په طبیعت کې بدلون راولي، نو انسانانو ته هم پکار ده، چې په خپلو ژوندانه کې ستر بدلونونه راولي. باید د هغه څه په لټه کې شي، چې د وطن او ولس په خیر او ګټه وي، خپلې هڅې په نوي هدف او پلان سره پیل کړي، ترڅو په هېواد کې د سمسورتیا او پرمختګ لامل وګرځي.
راځئ د پسرلي له دې موسم څخه داسې ګټه پورته کړو، چې د نفرتونو ځای د مینې او ورورګلوي په زړونو کې ځای ناستي شي. دې موسم ته د یو نوي ژوند په توګه وګورو، تر څو راتلونکي نسلونه زموږ په یووالي و ویاړي او زموږ تلوونکو کسانو ته دعاګانې وکړي.
