د ارزاقو امارتي شرکت له لوري سرپل ولایتي روغتون ته ۸ قلمه خوراکي توکي ولېږدول شول
د سرپل ولایت د ارزاقو لوی مدیر فضلالدین امید وایي، چې د ارزاقو امارتي شرکت له خوا تېره ورځ د دغه ولایت، ولایتي روغتون ته ۸ قلمه د اړتیا وړ خوراکي توکي لېږدول شوي دي.
د نوموړي په وینا، په یادو خوراکي توکو کې؛ ۱۰۰۰ کیلوکرامه وریجې، ۵۰۰ کیلوګرامه بوره، ۵۰ کیلوګرامه رُب، ۵۰ کیلوګرامه د خواړو مالګه، ۲۰۰ کیلوګرامه سره ممیز(کشمش)، ۸۰۰ کیلوګرامه لوبیا، ۶۰۰ لېتره مایع غوړي او ۱۰۰ کیلوګرامه چای شامل دي.
امید وویل، چې یاد خوراکي توکي د روغتون اړوند مسوول ته د دواړه لورو د کتنې پلاوو په شتون کې وسپارل شول.
نوموړي همداراز وویل، چې د ارزاقو امارتي شرکت پروژې په سرپل ولایت کې په منظم ډول پلي کېږي او د ارزاقو مدیریت له خوا یې په دوامداره توګه څارنه او ارزونه ترسره کېږي.
د یادونې وړ ده، چې ارزاقو امارتي شرکت د خپلو بنسټیزو فعالیتونو په دوام؛ د هېواد د پوهنتونونو لیلیو او نورو ادارو سره د شویو قراردادونو پر بنسټ؛ د اړتیا وړ خوراکي توکي لېږدوي.
