د ارزاقو امارتي شرکت کارکوونکو ته شپږ ورځنی روزنیز ورکشاپ پیل شو؛
د ارزاقو امارتي شرکت کارکوونکو ته د (حسابدارۍ اصطلاحاتو) تر سرلیک لاندې روزنیز ورکشاپ پیل شو، چې شپږ ورځې به دوام وکړي.
یاد ورکشاپ د ظرفیت لوړونې مدیریت له لوري تنظیم شوی، چې د کارکوونکو د مسلکي وړتیاوو لوړول او د حسابدارۍ اړوند اصطلاحاتو سره د دوی بلدتیا او پر مفاهیمو یې پوهاوی ترلاسه کول دي.
د ظرفیت لوړونې مدیر میرآغا رشیدي وایي، چې د دې ورکشاپ اصلي موخه د شرکت کارکوونکي د حسابدارۍ له بنسټیزو اصطلاحاتو او مفاهیمو سره آشنا کول دي، ترڅو په راتلونکي کې دوی د حسابدارۍ له نويو سیسټمونو او ټکنالوژۍڅخه اغېزمنه ګټه واخلي.
نوموړی زیاتوي، چې دا ډول پروګرامونه به دوام ومومي او د شرکت نورو کارکوونکو ته به هم ورته روزنیز فرصتونه برابر شي.
د ورکشاپ ګډونوال خوښي څرګندوي وایي، چې د یادې روزنې له لارې به ډېری عملي ستونزې حل شي. دوی غوښتنه وکړه، چې په دوامداره توګه د ټکنالوژۍ، مدیریت او نورو برخو کې ورته روزنیز ورکشاپونه او سیمینارونه هم په لاره واچول شي.
دا په داسې حال کې ده، چې له دې وړاندې د ظرفیت لوړونې مدیریت له لوري د شرکت کارکوونکو ته د انګلیسي ژبې او کمپیوټر پروګرامونو په برخه کې هم روزنیز کورسونه جوړ شوي وو.
