د بامیانو د ارزاقو مدیر د دې ولایت د عامې روغتیا له رییس سره وکتل
د بامیانو ولایت د ارزاقو لوی مدیر نعمت الله رحمتي خبر ورکوي، چې نن ورځ یې د یاد ولایت د عامې روغتیا له رییس سره لیدنه کړې ده.
نوموړي څرګنده کړه، چې په دې کتنه کې د روږدو کسانو د درملنې روغتون ته د خوراکي توکو د رسولو پر څرنګوالي، اړوندو ستونزو ته رسېدنه او په نورو موضوعاتو خبرې وشوې.
رحمتي زیاته کړه، چې په دې کتنه کې د عامې روغتیا رییس ډاکټر محمدغني صمیم غوښتنه وکړ، چې د اړتیا پر مهال دې خوراکي توکي په ټاکلي وخت نوموړي روغتون ته ولېږدول شي، چې د ارزاقو مدیریت له لوري د ژمنې او همکاریو ډاډ ورکړل شو.
د ارزاقو مدیر همداراز ډاډ څرګند کړ، چې د بامیانو ولایت د ورس ولسوالۍ د روږدو کسانو د درملنې روغتون مسوولین د ارزاقو امارتي شرکت له خدمتونو څخه خوښ دي او تر دې دمه کومه جدي ستونزه نه لري.
