د بلخ ولایت د ارزاقو لوی مدیر د نجونو روزنتون څخه څارنه وکړه
د بلخ ولایت د ارزاقو لوی مدیرمحمدکاظم مهدی یار وایي، چې تېره اوونۍ یې د دې ولایت د کار او ټولنیزو چارو ریاست اړوند د نجونو له روزنتون څخه څارنه او ارزونه کړې ده. نوموړی وایي، چې د دې څارنې موخه په دغه مرکز کې د خوړو د پخلي او ویش بهیر ارزونه وه.
ښاغلي مهدی یار وویل، چې د دې څارنې پر مهال د پخوو خوړو د ویش له لړۍ، د خوړو د کیفیت او کمیت، د پخلنځي د چاپېریال پاکوالی او کارېدونکي لوښي له نږدې وارزول شو او په پای کې اړینې لارښوونې د روزنتون اړوند مسوولینو ته وړاندې شوې.
هغه ډاډ ورکړ، چې یاد روزنتون ته د خوراکي توکي برابرول په ښه توګه روان دي او تر اوسه پورې په دې برخه کې هېڅ ډول ستونزه نه دی رامنځته شوې.
د مهدي یاز په وینا، له روزنتونونو څخه هره اوونۍ څارنه ترسره کېږي، څو د خوړو ویش او پخلی په سمه توګه وشي او ورته څارنې د روزنتون د مسوولینو د خوښۍ لامل ګرځي.
