د لغمان ولایت د ارزاقو لوی مدیر د کار او ټولنیزو چارو ریاست له روزنتون څخه څارنه وکړه؛
د لغمان ولایت د ارزاقو لوی مدیر وحیدالله الکوزی وایي، چې تېره چهارشنبه یې د دې ولایت د کار او ټولنیزو چارو ریاست اړوند روزنتون څخه څارنه او ارزونه وکړه. دا څارنه په داسې حال کې ترسره شوه، چې د روزنتون زدهکوونکو لپاره د غرمې مهال د پخلي او ډوډۍ د وېش بهیر روان و.
نوموړي زیاته کړه، چې په دغه څارنه کې د خوړو کیفیت، کمیت، د پخلنځي دسپلین او د آشپزانو یونیفورم وارزول شول. همداراز آشپزانو ته د یونیفورم د اغوستلو او د پخلنځي د پاکوالي په اړه لازمې سپارښتنې وړاندې شوې.
ښاغلي الکوزي دا هم وویل، چې د یاد روزنتون مسوولین د ارزاقو امارتي شرکت له پروژوي خدمتونو څخه خوښ دي او د خوراکي توکو د لېږد او اکمالاتو په برخه کې یې خپله رضایت څرګند کړی دی.
باید وویل شي، چې د ارزاقو امارتي شرکت مرکزي او ولایتي مسوولین تل هڅه کوي، ترڅو له خپلو اړوندو چوپړیزو خدمتونو څخه په دوامداره توګه څارنه وکړي، څو د خدمتونو په وړاندې کولو کې ستونزې رامنځته نه شي.
