د میدان وردګو ولایت څلوېښت بستریز روغتون ته ۹ قلمه خوراکي توکي ولېږدول شول
د میدان وردګو ولایت د ارزاقو لوی مدیر سیدشمس الدین اکبر وايي، چې ۹ قلمه خوراکي توکي د دې ولایت ۴۰ بستریز روغتون ته لېږدول شوي دي.
نوموړی زیاته کړه، چې په یادو خوراکي توکو کې ۷۰۰ کیلوګرامه وریجې، ۲۴۰ کیلوګرامه غوړي، ۱۰۴ کیلوګرامه بوره، ۱۸۰ کیلوګرامه لوبیا، ۲۱ کیلوګرامه شین چای، ۴۲ کیلوګرامه د خواړو مالګه، ۶۵ کیلوګرامه وچې شیدې،۵۴۰ دانې د چرګانو هګۍ او ۷۲ کیلوګرامه د بانجانو رومیو رُب شامل دي.
اکبر زیاتوي، چې دغه خوراکي توکي د دې ولایت د ارزاقو لوی مدیریت له خوا د یوه کتونکي پلاوي تر نظارت لاندې د ۴۰ بستریز روغتون مسوول ته سپارل شوي دي.
همداراز د ارزاقو مدیر وايي، چې نن ورځ یې د کار او ټولنیزو چارو ریاست اړوند روزنتون څخه هم څارنه او ارزونه کړې ده.
د یادونې وړ ده، چې ارزاقو امارتي شرکت په دې وروستیو کې نه یوازې د پوهنتونونو، روغتیايي مرکزونو، دیني مدرسو او روزنتونونو ته د خوراکي توکو برابرولو او لېږد ته پاملرنه کړې؛ بلکې د څارنې او ارزونې بهیرونه یې هم ګړندي کړي دي.
