د پروان ولایت د ارزاقو لوی مدیر د نجونو روزنتون څخه څارنه وکړه
د پروان ولایت د ارزاقو لوی مدیر نورالدین مقتصد وایي، چې وړمه ورځ یې د یاد ولایت د کار او ټولنیزو چارو ریاست اړوند د نجونو له روزنتون څخه څارنه او ارزونه وکړه. دا څارنه په داسې مهال ترسره شوه، چې د روزنتون زدهکوونکو ته د غرمې خواړه برابر شوي وو او د وېش لړۍ یې روانه وه.
نوموړي زیاته کړه، چې په دې بهیر کې د پروژو د تطبیق کارکوونکی احمدمنصور عمر هم ورسره ملګری و.
ښاغلي مقتصد وویل، د یادې څارنې پر مهال د پخو شوو خواړو د وېش بهیر وڅېړل شو او تر څنګ یې د خواړو کیفیت او د پخلنځي د چاپېریال پاکوالی هم له نږدې وارزول شو.
هغه ډاډ څرګند کړ، چې یاد روزنتون ته د خوراکي توکو برابرول په منظم ډول دوام لري او د روزنتون مسوولین د ارزاقو امارتي شرکت له خدمتونو خوښ او رضایت څرګندوي.
د مقتصد د څرګندونو له مخې؛ دا مهال د پروان ولایت د کار او ټولنیزو چارو ریاست اړوند د نجونو په روزنتون کې ۷۵ تنه بېسرپرستې او یتیمې نجونې تر روزنې لاندې دي، چې د هغوی لپاره د خواړو چمتو کول او برابرول د ارزاقو امارتي شرکت له خوا ترسره کېږي.
هېره دې نه وي، چې په مرکز او ولایتونو کې د خوراکي توکو د برابرولو او څارنې بهیر د ارزاقو امارتي شرکت له خوا په دوامداره توګه ترسره کیږي.
