د کابل پولي تخنیک پوهنتون لیلیې ته ۱۲ قلمه خوراکي توکي ولېږدول شول؛
ارزاقو امارتي شرکت د خپلو بنسټیزو فعالیتونو، سوداګریزو چارو او د ۱۴۰۴ مالي کال د پلان له مخې؛ وړمه ورځ د کابل پولي تخنیک پوهنتون لیلیې ته ۱۲ قلمه اړین خوراکي توکي لېږدولي دي.
د ارزاقو امارتي شرکت د مرکزي پروژو د تطبیق لوی مدیر قدرت الله ابراهیمي وایي، چې دغه خوراکي توکي د یاد پوهنتون د مسوول د غوښتنې په پام کې نیولو سره برابر او لېږدول شوي دي.
نوموړي زیاتوي، چې په دغو خوراکي توکو کې؛ ۲۰۳۹۸ کیلوګرامه وریجې، ۵۶۴۲ کیلوګرامه مایع غوړي، ۱۶۸۰ کیلوګرامه وطنۍ لوبیا، ۲۸۰ کیلوګرامه وطني لوی نخود، ۱۳۹۰ کیلوګرامه وطنۍ د خواړو مالګه، ۲۳۵۰ کیلوګرامه وطنۍ میده بوره، ۱۴۰ کیلوګرامه شین چای، ۴،۵ کیلوګرامه د چای هیل، ۲۶ کیلوګرامه وطنۍ زیره، ۴۳ کیلوګرامه د دیګ مساله، ۱۷ کیلوګرامه زرد چوبه او ۷۰۰ کیلوګرامه د بانجان رومیو رُب شامل دي.
ابراهیمي څرګندوي، چې دغه توکي د دواړو لوري د کتنې پلاوي په شتون کې د کابل پولي تخنیک پوهنتون لیلیې مسوول ته سپارل شوي دي. د پوهنتون د لیلیې مسوول د ارزاقو امارتي شرکت له خدمتونو خوښي ښودلې او د دوی له فعالیتونو څخه یې بشپړ رضایت څرګند کړی دی.
هېره دې نه وي، چې ارزاقو امارتي شرکت دا مهال د هېواد د ګڼ شمېر پوهنتونونو لیلیو ته د خوراکي توکو د برابرولو او لېږد بهیر چټک کړی دی.
