په کونړ ولایت کې د ارزاقو امارتي شرکت جایدادونه؛
د تېرو خپرونو په دوام؛ دا ځل د کونړ ولایت د ارازاقو امارتي شرکت په جایدادونو او ملکیتونو تاسو قدرمنو لوستونکو ته معلومات وړاندې کوو!
کونړ ولایت دختیځو ولایتونو څخه یو له مهممو او استراتیژیکو ولایتونو څخه شمېرل کیږي، چې د ارزاقو امارتي شرکت جایدادونه لکه ( سوداګریز مارکیټ، ګدامونه او ځمکې)په کې شته دي او د دې شرکت سوداګریزو فعالیتونو څخه برخمن ولایت دی او د عوایدو لاسته راوړلو یوه مهمه برخه جوړوي.
د کونړ ولایت دارزاقو مدیر ښاغلی کریم خان کلیوال په دې اړه څرګندوي وايي، چې د کونړ ولایت په ښار کې د ارزاقو امارتي شرکت د املاکي جایدادونو څخه یو هم څلور پوړیز سوداګریز مارکیټ دی، چې ۴۸ بابه فعالې هټۍ او ۲۸ بابه د اوسيدو خونې (اطاقونه) لري، چې یوه خصوصي شرکت ته د مشارکت په ډول په قرارداد ورکړل شوې او ۶۵ سلنه عواید یې د شرکت حساب ته جمع کېږي.
کلیوال زیاته وي، چې په کونړ ولایت کې د ارزاقو امارتي شرکت دوه بابه سنګي ګدامونه موجود دي، چې یو ګدام يې د شکرې ملکیت او بل یې د ٢٠٠٠ متر مربع ځمکې پر سر د سالار باغ اوسپنیز سرپوښ لرونکی ګدام دی، چې د کونړ ولایت د ارزاقو امارتي شرکت د مهمو ملکیتونو څخه شمېرل کېږي.
ښاغلي کلیوال په دې ټېنګار کوي وايي، چې د یادو جایدادونو سربیره؛ شرکت نور جایدادونه هم لري، چې د خلکو او یا هم دولتي ادارو لخوا نیول شوي، چې د بیا لاسته راوړلو لپاره یې هڅې روانې دي.
د ارزاقو د مدیر په وینا، په لنډه موده کې به د سالار باغ د سیمې اوسپنیز ګدام ۲۰۰۰ متر مربع ځمکه، چې څو ورځې وړاندې له غصب څخه راګرځول شوې، د آزادې داوطلبۍ له لارې په قرارداد ورکړل شي.
د پام وړ خبره دا ده، چې د کونړ ولایت د ارزاقو مدیریت د هلو ځلو په اساس؛ د یوې لویې لاسته راوړنې په توګه د سالار باغ اوسپنیز ګدام ځمکه، چې د کلونو غصب وروسته بیا ترلاسه شوې، د مدیریت له غوره او بریالیو فعالیتونو څخه شمېرل کیږي.
په همدې ډول د کونړ ولایت د ارزاقو مدیریت د پوهنتون شپه غالو، ولایتي روغتون او روزنتون ته د اړینو خوراکي توکو برابرولو او رسولو په برخه کې هم خپلې مهمې دندې په بري سره ترسره کوي.
#دنشراتو مدیریت
