د سرپل ولایت د ارزاقو امارتي شرکت د اداري ودانۍ د جوړېدو چارې پیل شوې
د سرپل ولایت د ارزاقو امارتي شرکت د اداري ودانۍ د جوړېدو چارې وړمه ورځ د دې ولایت د والي مرستیال ملا خال محمد، د ارزاقو مدیر مولوي حکمت الله وحدت او د ګڼ شمېر دولتي ادارو د مسوولینو په شتون کې پیل شوې.
د سرپل ولایت د ارزاقو مالي او اداري مدیر فضلالدین امید وویل، چې د یادې ودانۍ د جوړېدو چارې د ۱.۲ میلیونه افغانیو په لګښت پیل او ټاکل شوې ده، چې د دریو میاشتو په موده کې به بشپړې او ګټې اخیستنې ته وسپارل شي.
امید زیاته کړه، چې یاده ودانۍ د ښاروالۍ له لوري په ځانګړې شوې ځمکه کې، چې د سرپل ښار په دویمه ناحیه کې موقعیت لري په پاخه او اساسي ډول جوړیږي، چې دوه اداري خونې، دهلیز او نور ملحوقات به ولري.
نوموړي څرګنده کړه، چې دا مهال د سرپل د ارزاقو اداري چارې د دې ولایت د مستوفیت په ودانۍ کې ترسره کېږي، خو د یادې ودانۍ له جوړېدو وروسته به په اداري چارو کې لا زیاتې اسانتیاوې رامنځته شي.
