د کابل ابو علي ابن سینا طبي زده کړو پوهنتون اړوند علي آباد او ستوماتولوژي تدریسي روغتونونو ته خوراکي توکي ولېږدول شول
د امارتي شرکتونو لوی ریاست اړوند ارزاقو امارتي شرکت د خپلو بنسټیزو فعالیتونو، خدمتونو او سوداګریز پلان له مخې؛ د کابل ابو علي ابنسینا طبي زده کړو پوهنتون اړوند عليآباد او ستوماتولوژي تدریسي روغتونونو ته د اړتیا وړ خوراکي توکي ولېږدول.
د ارزاقو امارتي شرکت د پروژو د تطبیق آمر جان محمد عمري وویل، چې د تېرې اونۍ په وروستیو کې د شرکت له ګدامونو څخه عليآباد تدریسي روغتون ته نهه قلمه او د ستوماتولوژي تدریسي روغتون ته لس قلمه خوراکي توکي ولېږدول شول او د دواړو روغتونونو اړوند مسوولینو ته وسپارل شول.
د نوموړي په وینا، په دغو توکو کې وریجې، غوړي، لوبیا، نخود، بوره، شین چای او نور لومړني خوراکي مواد شامل دي، چې د روغتونونو د غوښتنې او د اړتیاوو د پوره کولو په موخه چمتو او ولېږدول شول.
د یادونې وړ ده، چې ارزاقو امارتي شرکت د خپلو بنسټیزو فعالیتونو پر دوام، د هېواد د پوهنتونونو لیلیو او نورو دولتي ادارو سره د شویو تړونونو له مخې، د اړتیا وړ خوراکي توکي په منظم او دوامداره ډول لېږدوي.
