د ارزاقو امارتي شرکت د اجرایوي کمېټې ناسته ترسره شوه
د ارزاقو امارتي شرکت د اجرایوي کمېټې نوبتي ناسته د شرکت د غونډو په تالار کې ترسره شوه، چې مشري یې د شرکت اجرائیوي رییس مولوي عبدالرازق رفیع کوله.
په دې ناسته کې د مالي او اداري چارو رییس مولوي مطیعالله مجروح، د سوداګریزو چارو د پراختیا رییس مولوي سید نیک محمد معتصم، د تدارکاتو، املاکو، مالي، د سوداګریزو پراختیا، د پروژو د تطبیق، د کارکوونکو چارو او خدماتو آمرینو او همدارنګه د کنټرول، پلټنې او پلان مدیرانو ګډون کړی و.
د ناستې په پیل کې د شرکت اړوند د املاکي، مالي، تدارکاتي او د پروژو د تطبیق موضوعاتو سربېره؛ د چارو د ښه پرمخ وړلو لپاره د اسانتیاوو رامنځته کول او یو شمېر غوښتنې او ستونزې تر بحث لاندې ونیول شوې.
په دې ناسته کې د اجنډا له مخې؛ ډېری هغه موضوعات، چې د شرکت له بنسټیزو کاري لومړیتوبونو څخه شمېرل کېدل، د اجرایوي کمېټې له لوري تایید او د نورو موضوعاتو په اړه لازمې پرېکړې وشوې.
د غونډې په پای کې د اجرایوي کمېټې مشر مولوي عبدالرازق رفیع د شرکت د فعالیتونو د لا ښه والي، د خدمتونو د وړاندې کولو او فعالیتونو د بهیر د چټکولو او پیاوړتیا پر اهمیت ټینګار وکړ او په ځینو برخو کې یې اړینې سپارښتنې هم وړاندې کړې.
ناسته د دعا په لوستلو سره پای ته ورسېده.
