د ارزاقو امارتي شرکت له لوري د لوګر ولایت پوهنتون لیلیې ته ۱۲ قلمه اړین خوراکي توکي ولیږدول شول؛
د ارزاقو امارتي شرکت د خپلو بنسټیزو او سوداګریزو فعالیتونو او پلان له مخې؛ ۱۲ قلمه اړین خوراکي توکي د لوګر ولایت پوهنتون لیلیې ته ولیږدول.
د لوګر ولایت د ارزاقو لوی مدیر ښاغلي انجنیر محمدنعیم حبیبي وویل، چې یاد توکي د ارزاقو امارتي شرکت او لوګر پوهنتون ترمنځ د تړون او غوښتنې پر اساس رالېږدول شوي ، چې د ارزاقو مدیریت له خوا د یو ګډ پلاوي په شتون کې د پوهنتون اړوند مسوول ته وسپارل شول.
حبیبي زیاته کړه، چې په یادو خوراکي توکي کې؛ ۲۷۹۲ کیلو ګرامه وریځي، ۷۱۲ کیلو ګرامه لوبیا، ۷۷۲ لېټره مایع غوړي،۱۰ کیلو ګرامه اومه نخود، ۳۰۸ کیلو ګرامه بوره، ۱۷ کیلو ګرامه شین چای، ۹۵کیلو ګرامه رُب، ۶ کیلو ګرامه د دیګ مصاله، ۱۹۰ کیلو ګرامه مالګه، ۳نیم کیلو ګرامه زیره، څه باندې یو کیلوګرامه هیل او دوه نیم کیلو ګرامه زرچوبه شامل دي.
حبیبي همداراز وویل چې سږکال د ارزاقو امارتي شرکت د لوګر پوهنتون سره د اړینو خوراکي توکو د رسونې او لېږد تړون تر لاسه کړی او دا لومړی ځل دی، چې د یاد شرکت له لوري د لوګر پوهنتون لیلیې ته خوراکي توکي لېږدول کېږي.
نوموړي زیاته کړه، چې له دې وړاندې د لوګر پوهنتون لیلیې زده کړیالانو ته د خوړو پر ځای نقدي اعاشه ورکول کېده، خو اوسمهال د اوسېدو او خوړو ترتیبات برابر شوي او ارزاقو امارتي شرکت سره د خوراکي توکو د لېږد او برابرولو قرارداد لري.
د ده په خبره؛ د ارزاقو امارتي شرکت په لوګر ولایت کې درې پروژې پر مخ وړي، چې له دې ډلې د کنجک روغتون، د کار او ټولنیزو چارو ریاست اړوند روزنتون او پوهنتون لیلیو ته د اړینو خوراکي توکو لېږد او برابرول شامل دي.
د یادونې وړ ده، چې تازه خوراکي توکي لکه؛ سبزي او میوه په ورځنۍ توګه د ارزاقو امارتي شرکت له لوري یاد بنسټ ته لېږدول کیږي.
