په ننګرهار ولایت کې د ارزاقو امارتي شرکت د نوي سوداګریز مارکیټ د جوړېدو چارې روانې دي
د ننګرهار ولایت د ارزاقو لوی مدیر ښاغلي محمد نادر نعمان ویلي، چې د ارزاقو امارتي شرکت اړوند ملکیت کې د نوي سوداګریز مارکیټ د جوړېدو چارې په ښه توګه پرمخ روانې دي.
ښاغلي نعمان زیاته کړه، چې د یاد مارکیټ د دریم پوړ د چت کانکریټ تېره ورځ د ښارجوړونې، ښاروالۍ او د ارزاقو امارتي شرکت د فني او مسلکي څارونکو په حضور کې واچول شو.
نوموړي څرګنده کړه، چې دغه نوي جوړیدونکي سوداګریز مارکیټ د ارزاقو امارتي شرکت له جایدادونو پورې تړاو لري، چې د ۱۴۰۲ هـ.ل کال په لړ کې له شهزاده ساپي خصوصي شرکت سره د جوړیدو قرارداد یې شوی او په مشارکتي ډول جوړیږي. دیاد سوداګریز مارکیټ مساحت ۱۶۵۰ متره مربع ښودل شوی دی.
هېره دې نه وي، چې ارزاقو امارتي شرکت خپل فعالیتونه؛ د سوداګریزو پلانونو او اهدافو پر بنسټ چټک کړي دي، چې د تېر نظام په پرتله په چارو کې له ۸۰ سلنې زیات پرمختګ تر سترګو کېږي.
